كيف ساعدني روتين بسيط في كسر الجمود الإبداعي؟
Nov 29, 2025
في أيام، كنت أقعد قدام الورق أو الآيباد، وأطالع الفراغ...
كل الأفكار اختفت، كل الحماس تبخر.
وأظل أقول: "بسوي شي، بس ما أدري شنو؟"
أنا متأكدة انك مريتي بنفس الشعور
كثير من الفنانين والمصممين سواء كانوا مبتدئين أو محترفين – يمرون بـ "البلوك الإبداعي".
مو لأنهم ما يقدرون يرسمون، لأنهم مو عارفين من وين يبدون.
قبل فترة، قررت أجرّب شي بسيط جدًا.
قلت لنفسي:
"أبي أرسم وردة كل يوم، بأي طريقة. قلم، ألوان، ديجيتال، حتى لو شخبطة."
ما كنت أبي نتيجة مثالية، بس التزام صغير.
ولأن التجربة كانت أسبوع واحد بس، انصدمت من الفرق!
كل يوم كنت أدخل مزاج التصميم أسرع،
الأفكار رجعت، وصرت أنتج أكثر وأستمتع أكثر، حتى لو الشغل بسيط.
ليش الروتين الإبداعي مهم؟
- يعطيك نقطة انطلاق يومية
بدل ما تضيع وقتك تفكر "شنو أرسم؟"، يصير عندك شي واضح تبدأين منه. - يقلل التوتر والكمال الزايد
لأنك مو مطالبة تصممين شي واااو كل يوم، بس تسوين خطوة بسيطة. - يرجع لك الثقة بنفسك
كل مرة تنجزين فيها شيء حتى لو بسيط ، يذكرك إنك ما فقدت لمستك وحسّك الفني.
شلون تبنين روتين تصميمك اليومي؟
ما في طريقة واحدة تناسب الكل، بس هذي الخطوات ساعدتني:
1. اختاري وقت بسيط وثابت
5 إلى 15 دقيقة يوميًا تكفي. المهم الالتزام.
2. حددي فكرة واضحة
مثلا انا حددت "وردة"، أو "عنصر من المطبخ"، أو "أي من الطبيعة".
كل ما كانت الفكرة محددة، كل ما كان أسهل تبدأين.
3. تجاهلي المثالية
ارسمي، خربشي، سوّي نسخة سيئة. مو لازم يكون شي تستعرضين فيه وبجماله.
4. سجّلي تقدمك
كل يوم، اكتبي أو صوري اللي سويتيه. راح تندهشين بعد أسبوع كيف تطورتي.
مو لازم تبدين من الصفر
أنا عارفة إن البداية هي أصعب نقطة.
وعشان جذي، سويت ملف اسمه "مساحتي الإبداعية اليومية"
صممته من تجربتي، وساعدني إني ألتزم وأرجع للإبداع بهدوء.
الملف فيه صفحات بسيطة تساعدك تكتبين أفكارك، تتابعين وقتك الإبداعي، وترتبين شتات الأفكار اللي أحيانا تسرق متعتنا.
📩 إذا تحسين انك تبين تبدأين عادتك الإبداعية،
ممكن يكون هذا الملف هو دفعتك الأولى اللطيفة 💛
[شوفي تفاصيله من هنا]
أنت قوة ابداعية
عضوية نسائية للمبدعات الفنانات اللي تحب يكون عندها عمل ودخل اونلاين من فنها
ابق على تواصل معنا
سجل بريدك الالكتروني لتصلك معلومات وفوائد عن هذا العالم الابداعي الجميل
