ما هو ستايلي وصوتي الفني؟ Signature Style
Sep 15, 2025
شنو ستايلي؟ عن رحلة تطوير أسلوبك في التصميم، وليش التقليد مو دايما شي سلبي
كم مرة جلستِ تطالعين تصاميم مصممين مبدعين وتقولين: "ياااه ودي أصمم بهالطريقة!؟
وكم مرة بعدها حسّيتي إن شغلك ما له هوية تصميم واضحة أو ما تحسين إنه يعكس شخصيتك كمصممة؟
خليني أقولك شي: تطوير ستايلك الشخصي في التصميم الجرافيكي ما يصير بيوم وليلة. كلنا نمر بمرحلة من التجارب والتقليد قبل نلقى صوتنا الإبداعي.
شلون يتكوّن "أسلوب التصميم الشخصي"؟
الناس تحب تسأل: "شنو ستايلك في التصميم؟
وهذا السؤال أحيانًا يسبب توتر، خاصة للمصمم المبتدئ. لأن كثير يعتقد إن المصمم الناجح لازم من البداية يكون له بصمة فنية واضحة وأسلوب تصميم معروف.
بس الحقيقة؟ أسلوب التصميم أو الستايل الخاص أو الصوت الفني ما ينولد معانا، يتكوّن مع الوقت.
لما تقلدين تصاميم تحبينها أو تحاولين ترسمين بنفس طريقة فنان معين، ترى بهالمرحلة أنت قاعدة تتعلمين. التقليد في التصميم مو سرقة إذا كان بدافع التعلم. هو وسيلة تفهمين من خلالها:
- شنو يعجبك؟
- شنو ما يناسبك؟
- شنو الأدوات أو الألوان اللي تريحك؟
التقليد خطوة في الطريق، مو نهاية الطريق
التقليد مفيد إذا استخدمتيه كوسيلة للتجربة. بس إذا صار هو هدفك، راح يوقف نموك.
جربي ستايلات كثيرة، خذي إلهام من ثقافات، من الطبيعة، من ذكرياتك. بعد فترة، بتبدين تلاحظين إن في لمسة قاعدة تتكرر في شغلك.
وهني يبدأ يتكوّن عندك الهوية البصرية الخاصة بك كمصممة
Signature Style
مؤشرات إنك بدأتِ تلاقين ستايلك الخاص:
- تحسين إن التصميم يشبهك.
- الناس صارت تعرف شغلك حتى بدون توقيع.
- تكررين عناصر أو ألوان تحبينها بدون ما تحاولين.
كيف أطور ستايلي في التصميم؟
هذي بعض الطرق اللي تساعدك تطورين أسلوبك الخاص كمصممة:
- جربي تحديات التصميم المختلفة.
- سوي مشاريع شخصية تعبر عنك.
- احفظي التصاميم اللي تلهمك ودرسيها.
- استمري في التعلم من مصممين ثانيين، بس لا تنسخين كل شي.
- اسألي نفسك دايما: هل التصميم هذا يمثلني؟
ختامًا...
تطوير أسلوب التصميم الشخصي هو رحلة مستمرة.
ما في مصممة تصحى يوم وتقول أوكي، هذا ستايلي النهائي. أنت تتغيرين، وذوقك يتطور، وبيئتك تأثر عليك.
فلا تخافين من التجربة. ولا تستحين إذا بدأتي بالتقليد، أهم شي إنك تواصلين وتستمرين بالتصميم لحد ما توصلين لخطك وستايلك.
وبالنسبة للسؤال اللي دايم نسمعه "شنو ستايلك؟...
جاوبي عليه بثقة: ستاايلي يتكوّن كل يوم، مع كل تجربة جديدة أعيشها في عالم التصميم.
ولا تنسين ! استمتعي بالرحلة 🤍
أنت قوة ابداعية
عضوية نسائية للمبدعات الفنانات اللي تحب يكون عندها عمل ودخل اونلاين من فنها
ابق على تواصل معنا
سجل بريدك الالكتروني لتصلك معلومات وفوائد عن هذا العالم الابداعي الجميل
