ما تعلمته في معرض باريس: الشركات تبي يد المصممة، مو الذكاء الاصطناعي

هل الشركات تدور على تصاميم مرسومة بيد المصممة؟ إي، وهذا أهم شي طلعت فيه من معرض ميزون أند أوبجيه (Maison&Objet) في باريس. أغلب الزوار اللي وقفوا عند ركني ما سألوا عن الأسعار أول شي. سألوا: شلون ترسمين؟. وهالسؤال غيّر نظرتي لشغلي.

ليش سؤال شلون ترسمين؟ يفرق؟

الكل هالأيام يتكلم عن الذكاء الاصطناعي ويخاف يآخذ مكان المصمم. بس اللي شفته بعيوني عكس الخوف: الشركات تبي شي وراه إنسان. تبي خط انرسم باليد، وتعب، ولمسة ما تتكرر. وتبي بعد فكر المصمم ونظرته وذوقه واسلوبه. هالشي يخليها تثق إن التصميم أصلي وإنه ما يشبه غيره.

وبعد وقف ناس يسألون عن الأسلوب العربي الخليجي في التصميم. فخرت جدا بهالاهتمام، لأنه يعني إن للمصممة العربية مكان في السوق العالمي. ورجعت من باريس وأنا مطمّنة إن اللي أسويه له قيمة كبيرة وله سوق فعلا مو كلام، وإن اليد اللي ترسم ما راح تنباع بسهولة.

شنو تستفيد منه أي مصممة باترن؟

هذي أربعة أشياء أنصح فيها كل وحدة تبي تبيع تصاميمها:

١. وثّقي طريقتك في الرسم

صوري مراحل شغلك: الرسمة الأولى، الألوان، النتيجة النهائية. الشركات تبي تشوف كيف صممتي وشلون فكرتي، وهذا يثبت إنه شغلك أنتِ.

٢. جهزي ملفك قبل ما تحتاجينه

لما تجي الفرصة ما بيكون عندك وقت تجمعين شغلك. خلي ملفك جاهز: كم تصميم قوي، وتعريف قصير عنك، ووسيلة تواصل واضحة. وهذا اللي نسميه بورتفوليو.

٣. اعرفي كيف تبيعين التصميم

هل تبيعينه بالكامل لشركة، أو تعطينها حق استخدامه (ترخيص) وتاخذين نسبة من المبيعات؟ لكل واحد حساباته وشروطه، ولازم تعرفينها قبل أول محادثة ولازم تكونين فاهمه جميه الأنواع.

٤. تابعي الاتجاهات

اللي يعرف شنو بيطلب السوق يصمم له بدل ما يخمن. المعارض مكان ممتاز تشوفين فيه الألوان والأنماط اللي تتحرك، وكذلك المواقع المختصة باتجاهات السوق دائما تعطيك التوقعات والمعلومات من مصادر رسمية لسنتين أو ٣ سنوات قادمة.

كيف أبدأ بيع تصاميمي للشركات؟

ابدئي بخطوة وحدة: اختاري ثلاثة تصاميم من شغلك، ورتبيها في صفحة وحدة تعرّفين فيها بنفسك. وهذا اللي أشرحه خطوة خطوة في دورة فن تصميم الباترن. التسجيل فيها يفتح ١ نوفمبر.

وإذا رسمتي وما تدرين شلون تحولينها لباترن مكرر جاهز للطباعة، فيه ورشة من رسمة إلى باترن تاخذك من أول خط لين الباترن.

وإذا تبين تكونين وسط مصممات يتعلمن معك، عضوية القوة الإبداعية ممكن تفتح نهاية ديسمبر، وتقدرين تسجلين في قائمة الانتظار. وإذا تبين تعرفين شنو الألوان والأنماط اللي تتحرك في السوق، فيه تقرير التوجهات.

أسئلة شائعة

هل الذكاء الاصطناعي بيلغي وظيفة مصممة الباترن؟

من اللي شفته في باريس، اكيد لا. بالعكس تماما، صارت الشركات تقدّر العمل اليدوي أكثر وصار له قيمة أكبر لأنه يعطيها تصميم أصلي ما يتكرر.

هل لازم أسافر للمعارض عشان أبيع تصاميمي؟

لا. تقدرين تبدئين من بيتك: تصاميم مصممة بطريقة صحيحة وواضحة، بورتفوليو مرتب، وتواصل مع الشركات.

كم تصميم أحتاج عشان أبدأ؟

ثلاثة تصاميم قوية ومرتبة ولها قصة ومواكبة للتوجهات القادمة أفضل من عشرين تصميم عشوائي.