أحيانًا فكرة كوليكشن كامل تبدأ من لحظة عادية

دائمًا نتخيل إن فكرة الكوليكشن لازم تبدأ بطريقة معينة أو بترتيب محدد أو مكان

سفرة لمكان جديد.

معرض فني.

كتاب غريب.

ترند جديد.

أو Moodboard مرتب ومليان صور جميلة.

بس مؤخرًا صار معاي العكس تمامًا.

كنت قاعدة أجهز محتوى إبداعي جديد للعضوية، أبحث وأكتب وأجمع أفكار وأسأل نفسي:

شلون أخلي هذا المحتوى مو مجرد تمرين حلو… لكن بداية ممكن فعلًا تاخذ المصممة لمكان جديد؟

وأثناء التحضير، صار شيء ما كنت حاسبته.

المحتوى اللي كنت أجهزه لهم…

بدأ يشتغل عليّ أنا. 😂

من لحظة عادية جدًا…

فجأة تذكرت موقف بسيط من حياتي اليومية.

مو موقف كنت مخططة أحوله إلى تصميم.

ولا حتى كنت أشوفه “مصدر إلهام”.

مجرد لحظة عادية.

لكن هذه المرة وقفت عندها.

وبدأت أسأل:

ليش أثرت فيني هذه اللحظة؟

شنو الشعور اللي وراها؟

هل فيها شيء أكبر من الموقف نفسه؟

هل ممكن تتحول إلى قصة؟

ومن سؤال صغير…

بدأ الخيط.

فكرة.

وبعدين فكرة ثانية.

كتبت كلمات.

جمعت صور.

بدأت أشوف ألوان.

وتخيلت رسومات.

وبدأ يتكون في بالي عالم كامل.

وهني قلت:

لحظة… أعتقد عندي بداية كوليكشن جديد.

يمكن الإلهام مو ناقصنا أصلًا

أحيانًا نقعد نبحث عن الإلهام في Pinterest وInstagram والمجلات والترندات…

وما فيهم شيء غلط.

أنا أول وحدة أحب أقعد وأضيع بين الصور 😅

لكن المشكلة تبدأ لما نعتقد إن الإلهام موجود هناك فقط.

يمكن عندج عشرات الأفكار حولج أصلًا.

في بيتج.

في سوالف عائلتج.

في شيء ضحكج أمس.

في عادة تسوينها كل صباح.

في غرض قديم محتفظة فيه من سنين.

في لون يذكّرج بشخص.

أو حتى في موقف ضايقج.

الفرق مو دائمًا في كمية الإلهام اللي حولنا.

الفرق أحيانًا في:

هل تعلمنا ننتبه له؟

من موقف إلى معنى

وهذي المرحلة اللي قاعدة أعيشها الحين مع الكوليكشن الجديد.

أنا للحين ما أبي أكشف فكرته.

خلوه شوي بيني وبين السكيتش بوك 😌 

حطيت أفكاري بس ما بديت فيه بعد

لكن الشيء اللي متحمسة له مو بس شكل الرسومات

أنا متحمسة للمعنى اللي بدأ يتكوّن وراها.

لأن بالنسبة لي، أقوى الكوليكشنات مو اللي تقول:

“شوفوا شكثر الباترن حلو.”

لكن اللي تخليج تحسين إن وراه شيء.

ذكرى.

وجهة نظر

شعور

أو قصة

وبعدها يأتي دور التصميم ليترجم هذا الشيء بصريًا

 Creative Briefوهني فهمت ليش أحب الـ 

لأن البريف الجيد ما يعطيج قائمة أشياء ترسمينها

بالنسبة لي، هو يعطيج بابًا تدخلين منه.

لكن وين تروحين بعد الباب؟

هذا يعتمد عليج

على حياتج

على ذاكرتج

على الأشياء اللي تلفت انتباهج

وعلى الطريقة اللي تشوفين فيها العالم

وهذا بالضبط اللي أبي البنات يجربونه في المحتوى القادم داخل العضوية

مو إننا كلنا نطلع بنفس النتيجة

بالعكس

أبي أشوف شلون فكرة واحدة ممكن تمر على مجموعة مصممات…

وتطلع من كل وحدة بطريقة مختلفة تمامًا.

وأنا؟

بدأت رحلتي فعلًا.

عندي الآن صفحات مليانة ملاحظات

أسئلة

صور

ألوان بدأت تظهر

وأفكار باترنات قاعدة تتشكل شوي شوي

ويمكن بعض الأفكار تختفي بالطريق

ويمكن شيء ما فكرت فيه أصلًا يصير أهم باترن في المجموعة

وهذا الجزء اللي أحبه

إني للحين ما أعرف بالضبط وين راح توصلني الفكرة

بس أعرف شيء واحد:

هذه المرة ما بدأت من ترند

ولا من Pinterest.

ولا من قرار:

“يلا، لازم أسوي كوليكشن جديد.”

بدأت من الحياة نفسها

ويمكن هذا أحلى مكان تبدأ منه فكرة

وأوعدكم…

لما يصير وقتها، راح أرجع وأقول لكم القصة من البداية. 🤍