لما بدأت في تصميم الباترن قبل ٦ سنوات، ما كان عندي أحد يرشدني

ما عندي دراسة أكاديمية في التصميم. ما عندي خلفية فنية. ما عندي أحد في حياتي يعرف شنو يعني "تصميم الباترن" أصلاً

تعلمت بالطريقة الصعبة — بالأخطاء والوقت الضائع والإحباط. واليوم بعد ما تصاميمي وصلت لشركات عالمية ودربت مصممات من العالم العربي، أقدر أقول لك: كان ممكن أختصر سنوات لو أحد قال لي هالأشياء الخمس من البداية

أولا: الموهبة وحدها ما توصّلك لأي مكان

هالجملة ممكن تكون صادمة ، بس هي الحقيقة

شفت مصممات عندهم موهبة خرافية بس ما باعوا تصميم واحد. وشفت مصممات تصاميمهم "عادية" بس يبيعون بشكل مستمر

الفرق؟ الثانية عندها منهج. تعرف كيف تربط تصميمها بالسوق. تعرف شنو يحتاجه المشتري. تعرف كيف تقدم نفسها

الموهبة هي الأساس ، بس بدون استراتيجية، تبقى هدية مغلّفة ما أحد يشوفها

ثانيا: الشركات ما تشتري "تصميم حلو"! تشتري حل

أكبر نقلة صارت في مسيرتي لما فهمت هالشي: الشركة اللي تشتري تصاميم ما تدوّر على "شي حلو." هي تدوّر على كوليكشن يحل لها مشكلة ، يناسب موسمها، يتماشى مع هوية منتجاتها، ويجي جاهز للإنتاج

يعني لو أنتِ ترسلين لشركة باترن واحد حلو ، حتى لو هو فعلاً حلو ، ما راح تستخدمه. لأنها تحتاج مجموعة متكاملة تشتغل مع بعض

هالفرق البسيط في طريقة التفكير يغيّر كل شي: من "أنا أصمم وأتمنى أحد يشتري" إلى "أنا أصمم شي الشركة تحتاجه."

 ثالثا:ما تحتاجين تكونين "جاهزة" عشان تبدأين

هذا الوهم اللي يوقف أكثر المصممات: "بعد ما أتعلم أكثر."

كل مصممة ناجحة أعرفها بدأت وهي تحس بنفس الشي اللي تحسين فيه الحين ، الشك، الخوف، الإحساس إنها مو جاهزة

الجاهزية ما تجي من الانتظار ، تجي من الممارسة. أول باترن سويته كان بسيط جداً. لو أشوفه الحين أضحك على نفسي. بس هالباترن البسيط علّمني أكثر من أي كورس أو كتاب

سوّي أول خطوة وأنتِ خايفة … هذا الطبيعي

 رابعا: التسعير يحدد مسيرتك أكثر من التصميم

ما أحد يحب يتكلم عن الأرقام ، بس هالشي لازم ينقال

مصممات كثير يسعّرون تصاميمهم بأقل من قيمتها لأنهم يخافون يخسرون الفرصة. النتيجة: يشتغلون ساعات طويلة ويكسبون أقل مما يستحقون ، ويحسون بالإحباط

تعلّم التسعير الصحيح مو رفاهية ، هو اللي يحدد إذا مسيرتك بتستمر ولا بتوصلين لمرحلة "ما يستاهل." كثير مصممات تركوا المجال مو لأنهم فشلوا ، لأنهم ما كانوا يكسبون ما يكفي عشان يستمرون

التسعير مهارة تجارية ، ما لها علاقة بالموهبة. وهي شي تتعلمينه

 خامسا: كل مصممة تحتاج خطة مختلفة … مو نفس الخطة

وهذا أهم شي أبيك تاخذينه من هالمقالة

المصممة اللي توها تبدأ تحتاج خطة مختلفة تماماً عن المصممة اللي عندها تصاميم وتبي تبيع. والمصممة اللي عندها مبيعات وتبي توصل للشركات الكبيرة تحتاج شي ثالث مختلف

النصايح العامة اللي تنفع للكل ، في الغالب ما تنفع لأحد. لأنها ما تاخذ بالاعتبار وين أنتِ الحين

وهذا بالضبط اللي خلاني أسوي اختبار قصير يحدد مرحلتك ويعطيك خطة مخصصة ، مو كلام عام.

وين أنتِ الحين؟

٧ أسئلة … دقيقتين … وبتعرفين بالضبط وين أنتِ وشنو الخطوة اللي تحتاجينها.

بعد ما تخلّصين بتحصلين على خطة عملية مصممة لمرحلتك + هدية مجانية تبدأين فيها اليوم.

👇 اكتشفي مرحلتك

[✦ ما مرحلتك كمصممة باترن؟] خذي الاختبار وتعرفي على مرحلتك 

كل المصممات اللي أشتغل معاهم بدأوا من نقطة. مو كلهم من نفس النقطة ، بس كلهم أخذوا الخطوة الصحيحة لمرحلتهم. وأنتِ بعد تقدرين