تعرفين تصممين... بس كم كولكشن كامل عندج؟

خليني أبدأ بسؤال بسيط.

افتحي الملفات عندج الحين، حتى لو بس في بالج 😄

كم Pattern صممتي؟

كم رسمة عندج؟

كم Moodboard سويتي؟

وكم فكرة قلتي عنها:

«أوووه... هذي تصلح كولكشن كامل!»

وايد، صح؟

طيب...

كم كولكشن كامل عندج فعلًا؟

مو فكرة كولكشن.

مو Pattern واحد حلو قلتي يومًا ما بكمله.

ومو فولدر اسمه:

NEW COLLECTION FINAL 2 😂

أقصد كولكشن خلصتيه فعلًا.

Hero Pattern Supporting Patterns Coordinates ألوانه متماسكة معروض بطريقة حلوة وموجود في بورتفوليوج

هني غالبًا الرقم يصغر.

وهذا بالضبط الشي اللي قعدت أفكر فيه الفترة الأخيرة.

يمكن المشكلة مو إنج ما تعرفين تصممين

إحنا كمصممات نحب نتعلم.

Tutorial جديد؟ يلا.

تقنية رسم جديدة؟ أكيد.

طريقة Repeat مختلفة؟ لازم أجربها.

دورة جديدة؟ يمكن هذي هي اللي ناقصتني.

وأنا آخر وحدة راح أقول إن التعلم مو مهم.

بالعكس.

لكن في مرحلة معينة، المشكلة ما تعود:

«ما أعرف.»

تصير:

«ما أطبق اللي أعرفه بشكل مستمر.»

وهذا فرق كبير.

ممكن تكونين فعلًا تعرفين ترسمين.

وتعرفين تسوين Repeat.

وتعرفين تختارين ألوان.

وتعرفين Illustrator أو Procreate.

ويمكن حتى أخذتي دورة كاملة في بناء الكولكشن.

لكن للحين كل ما فتحتي اللابتوب تحسين:

أوكي... شنو أصمم اليوم؟

تبدين Pattern.

بعدين تجيج فكرة ثانية.

تروحين Pinterest «بس خمس دقايق»...

وفجأة مرّت ساعة وعندج 48 صورة محفوظة وفكرة جديدة تمامًا 😅

وبعدين المشروع الأول يظل هناك.

مو لأنه سيئ.

بس لأنه ما كان عنده طريق واضح من البداية للنهاية.

في فرق بين Pattern حلو وBody of Work

وهذا يمكن أهم شيء استوعبته.

المصممة ما تبني مسيرتها من Pattern واحد حلو.

ولا حتى من كولكشن واحد.

هي تبنيها من شغل يتراكم.

كولكشن.

وبعده كولكشن.

ومشروع بعد مشروع.

ومع كل واحد...

تتعلمين شيء عينج تتغير قراراتج تصير أسرع تعرفين شنو يشبهج وشنو لا تعرفين متى التصميم يحتاج شغل ومتى المشكلة إنج بس مو راضية توقفين تعديل 😂 هذه أنا هني اتكلم عن نفسي الصراحة

والأهم؟

البورتفوليو يبدأ يكبر.

مو لأنج قلتي:

«لازم يوم من الأيام أرتب البورتفوليو»

لكن لأن كل مشروع تخلصينه يصير قطعة جديدة فيه.

وهذا فرق ضخم.

طيب... ليش نبدأ وايد وما نكمل؟

أعتقد لأن البداية ممتعة.

الفكرة الجديدة فيها حماس.

البحث ممتع.

اختيار الألوان ممتع.

أول رسمة ممتعة.

لكن بعدين نوصل للمنتصف.

وهني تبدأ القرارات.

هل هذا الـHero؟ هل أحتاج Supporting ثاني؟ هل الألوان متوازنة؟ هل التصميم خلص؟ هل هذا الكولكشن أصلًا قوي؟

وبعدين يطلع الصوت المشهور عند كل مصممة:

🫣 «يمكن أحتاج أتعلم شوي أكثر قبل لا أكمل»

مممم... يمكن.

لكن مو دائمًا.

أحيانًا اللي تحتاجينه مو معلومة ثانية.

تحتاجين تكملين.

حتى لو مو كل قرار كامل.

لأن الكولكشن اللي خلصتيه راح يعلمج أكثر من عشرة كولكشنات موجودة في بالج.

يمكن المشكلة مو نقص الإلهام

أحيانًا نقول:

«ما عندي إلهام.»

لكن لو فتحنا Pinterest عندنا...

واضح جدًا إن الإلهام مو ناقص 😂

عندنا أفكار أكثر من الوقت اللي نقدر ننفذها فيه.

المشكلة أحيانًا إننا متعودين على البداية أكثر من إننا متعودين على الإنهاء.

كل ما خف حماس المشروع...

نبدأ واحد جديد.

فيعطينا دفعة حماس ثانية.

لكن لو استمرينا بهالطريقة، بعد سنة ممكن يكون عندنا عشرات البدايات...

ولا شيء قوي نقدر نحطه قدام شركة ونقول:

هذا شغلي.

وهني لازم تتغير اللعبة.

مو نحتاج فكرة أكثر.

نحتاج قدرة أكبر على أخذ فكرة وحدة...

ونكمل معاها إلى النهاية.

بدل «شنو أتعلم؟» جربي سؤال ثاني

الفترة الأخيرة غيرت سؤال عندي.

بدل ما أفكر:

شنو المحتوى اللي تحتاجه المصممة؟

بدأت أسأل:

شنو أبي المصممة تنجز؟

فرق بسيط بالكلمات...

بس غير عندي أشياء وايد.

لأن لو هدفي إنج تتعلمين عن الكولكشن، أقدر أعطيج عشرين درس.

لكن لو هدفي إنج تطلعين بكولكشن فعلي...

راح أصمم التجربة بطريقة مختلفة تمامًا.

أقل محتوى أكثر تنفيذ أقل: «شاهدي هذا» وأكثر: «الحين دورج... روحي سوي.»

وأحيانًا ما تحتاجين مني درس جديد أصلًا.

يمكن تحتاجين أسبوع كامل ما أضيف لج فيه أي معلومة.

بس أقول لج:

الحين عندج اللي تحتاجينه.

كملي شغلج.

وأعتقد إحنا نقلل من قيمة هالنوع من المساحة.

نحسب إذا ما تعلمنا شيء جديد، معناته ما تقدمنا.

مع إن أحيانًا أكبر تقدم يصير لما نوقف نتعلم شوي...

ونستخدم اللي تعلمناه أصلًا.

تخيلي بدل ما تعدّين الدروس... تعدين المشاريع

هذا هو التحول اللي يعجبني.

بدل نهاية السنة تقولين:

«أخذت 4 دورات.»

أو:

«شفت 87 فيديو.»

تفتحين بورتفوليوج وتقولين:

هذا الكولكشن الأول. وهذا الثاني. وهذا المشروع اللي جربت فيه اتجاه مختلف. وهذا اللي لأول مرة حسيت فيه إن ستايلي بدأ يوضح. وهذا اللي حطيته في البورتفوليو. وهذا اللي عرضته على شركة. وهذا اللي ما نجح مثل ما توقعت... بس علمني شنو أغير بالمشروع اللي بعده.

هذي بالنسبة لي رحلة المصممة.

مو خط مستقيم.

ومو كل كولكشن راح ينباع.

ومو كل إيميل راح يجي عليه رد.

أكيد لا.

لكن كل مرة تكملين فيها العملية من البداية للنهاية...

أنتِ قاعدة تبنين شيء أكبر من Pattern.

قاعدة تبنين نفسج كمصممة تقدر تنتج شغل، تكمله، وتطلعه للعالم.

فسؤالي لج اليوم مو: شنو تبين تتعلمين؟

سؤالي:

شنو تبين يكون موجود في بورتفوليوج بعد سنة من اليوم... وهو مو موجود الحين؟

كولكشن واحد؟ ثلاثة؟ خمسة مشاريع قوية؟ ستايل أوضح؟ أول مرة تعرضين شغلج على شركة؟ أول فرصة Licensing؟

ما أعرف شنو جوابج.

لكن اكتبيه.

وبعدين بدل ما تسألين:

«شنو لازم أتعلم قبل لا أبدأ؟»

جربي تسألين:

«شنو لازم أكمل عشان أقرب لهناك؟»

لأن يمكن عندج أصلًا معلومات أكثر مما تحتاجين للخطوة الأولى.

ويمكن المرحلة الياية مو محتاجة منج تتعلمين أكثر.

يمكن محتاجة شيء أبسط...

وأصعب شوي:

تختارين مشروع واحد.

وتكملينه. 🤍

— فاطمه