7 أشياء تمنيت معرفتها قبل أن أبدأ كمصممة مستقلة

كلنا نبدأ بحماس…

شغف، ألوان، أفكار، أحلام كبيرة، ودفتر مليان سكتشات.

لكن بعد أول أسبوع، أول مشروع، أول عميلة… تبدأ الصورة تتغيّر شوي شوي.

أنا شخصيًا، تمنيت أحد يمسك يدي ويقول لي بصراحة:

“هذي الأشياء سويها، وهذي… وفّري على نفسك عناء التجربة!”

هذي 7 أشياء تعلمتها برحلتي في عالمي الابداعي، وأشاركك إياها من القلب:

1. الشغف مهم، بس النظام هو اللي يخلّيك تستمرين

في البداية كنت أشتغل لما اكون بمزاج عالي.

أحيانًا أرسم يومين متواصل، وأحيانًا أسبوع ما ألمس شيء.

بعدين تعلمت إن الإبداع بدون نظام، يصير هواية… مو شغل.

جربت:

•   أخصص يوم واحد بالأسبوع بس للريم ، اجباري مافي نقاش ، لو برسم ايام ثانية عادي المهم هذا اليوم التزم فيه

•   أكتب “أهدافي الإبداعية” البسيطة

•   أستخدم مؤقت (حتى لو 25 دقيقة)

والنتيجة؟ صار عندي إنتاج مستمر، بدون ما أفقد المتعة.

2. مو كل فكرة لازم تصير مشروع

أي شي كنت أحبه، كنت مباشرة أفكر: “أصممه؟ أطبعه؟ أبيعه؟”

بس صدقيني، مو كل شي نحبّه لازم يتحوّل لشغل.

فيه شغل عشان المال.

وفيه شغل عشان الروح.

وإذا خلطناهم دايم… نحترق.

الحين؟

أخصص دفتر للرسم الحر. بدون هدف، بدون جمهور. بس لي.

3. التفاعل ما يعني نجاح (ولا قلّته فشل)

أذكر أول بوست نزلته كان فيه ٣ لايكات فقط، تحبطت هههه.

بعدين وصلتني أول رسالة من عميلة تقول: “تصميمك خلاني أبجي من جماله ( اكيد مابجت هي عبرت بهالاسلوب مو معقوله بجت يعني ههه) ولي اليوم التليقات توصلني بالخاص هي اللي خلتني استمر وبعدهم مايحطون لايق ولا يعلقون بالعام”.

هني فهمت إن النجاح مو بعدد اللايكات.

النجاح الحقيقي؟ لما توصلين إحساسك للي يشتريه، أو حتى يشوفه بس.

4. سعر شغلك لازم يكون منطق + احترام لتعبك

كنت أسعّر بخجل. أخاف أطلب كثير.

لكن تعلمت إن السعر هو احترام للوقت، للخبرة، وللجودة.

حطي نفسك مكان العميل:

•   هل الملف منظم؟

•   هل تصميم احترافي جدا؟

•   هل فيه لمسة تعب واضحة؟

إذا نعم… سعّري بثقة.

5. التسويق ما هو استعراض، هو تواصل

كنت أكره فكرة “أني أبيع نفسي”

بس بعدين فهمت:

أنا ما أبيع نفسي… أنا أشارك شغلي، قصتي، وأقول “إذا عجبك، تفضل”.

أبدأي بمشاركة حقيقية:

•   “ليش رسمتي هالقطعة؟”

•   “شنو أكثر تحدي فيها؟”

•   “شنو حسيتي لما خلصتيها؟”

الناس ما تشتري منتج… تشتري شعور.

6. المثالية تقتل اللحظة الإبداعية

أقعد ساعات أعدّل تفصيلة صغيرة.

أمسح، أرجع، أعيد… لين خلاص اوصل لمرحلة ما أحب هذا التصميم.

بعدين قررت أتبنّى قاعدة:

“انشري اليوم، طوّري غدًا.”

مو لازم كل شي يكون بيرفكت.

يكفي يكون حقيقي… وفيه فرصة يكبر معك.

7. وجود دعم حوالينك مو رفاهية، هو ضرورة

أيام كنت أحس إني أشتغل بروحي، ما كنت أعرف شنو أسوي بعدها.

بس أول ما دخلت مجموعة فيها مصممات، تغير كل شي.

•   شفت تجارب تشبهني

•   تعلمت أشياء ما كنت ألاحظها

•   تحمّست من غير ما أدري

المجتمع الإبداعي ما يخليك تمشين بروحك… يخليك تستمتعين تتطورين وتتعلمين كل يوم والاهم يشجعك على الاستمرار.

💛 خلاصة من قلب:

العمل الحر كمصممة مستقلة ممتع، بس مو دايم سهل.

وكل ما زادت معرفتك، ونضجك، وشجاعتك… كل ما صار الطريق أخف، وأجمل.

✨ ولهالسبب، عضويتنا الخاصة وجدت.

مكان تمشين فيه مع ناس يشبهونك، تدعمينهم، ويدعمونك.

 ابدئي، حتى لو تحسين إنك متأخرة.

اللحظة اللي تقررين تبدأين فيها… هي اللحظة اللي يتغير بعدها كل شيء 💛

حابة تعرفين تفاصيل العضوية قبل لايسكر التسجيل؟ شوفيها هني