ملف رقمي أم منتج مطبوع؟ اكتشفي أفضل طريقة لبيع تصاميمك

 لما تخلصين من تصميم حلو، ايي السؤال الكبير:

أبي أبيع هذا… بس شلون؟ كملف رقمي؟ ولا أحطه على منتج؟

الحقيقة؟

ما فيه جواب واحد صحيح، كل طريقة لها مزايا وتحديات.

بس إذا فهمتي الفرق، راح تقدرين تختارين اللي يناسبك، أو حتى تجمعين بينهم بطريقة ذكية.

هني أشرح لك الفرق بين الطريقتين، وبعطيك نقاط تساعدك تقررين شنو الأنسب لك:

🖥️ أولاً: بيع الباترن او التصميم كـ ملفات رقمية

هني العميل يشتري الباترن او التصميم نفسه، على شكل ملفات جاهزة للتحميل. غالبًا يستخدمها في:

•   الطباعة عنده

•   منتجاته الشخصية أو التجارية

•   خلفيات، تغليف، ستيكرات، تصميم داخلي، إلخ

المميزات:

✅ بيع متكرر لنفس الملف (مرة وحدة تصممينه، وينباع أكثر من مرة)

✅ ما في شحن أو مخزون

✅ مناسب للمصممات اللي يحبون التنظيم والديجيتال

✅ السوق العالمي مفتوح لك (Etsy، Creative Market…)

التحديات:

🔸 يحتاج تسويق ذكي لأن السوق مليان

🔸 لازم يكون الملف مرتب واحترافي

🔸 فيه عملاء يشترون ولا يتركون تقييم أو يتواصلون

 ثانياً: بيع الباترن او التصميم على منتجات مطبوعة

هني تحطين الباترن على منتج مثل:

•   مفارش

•   أكواب

•   كروت

•   شنط قماش

• ورق جدران

•   بوكسات هدايا

المميزات:

✅ المنتج ملموس – يوصل للناس ويحسّون فيه

✅ الصور تسوّق لنفسها (ممكن ينتشر بدون مجهود كبير)

✅ تفتحين مجال للإبداع في التقديم والتغليف

التحديات:

🔸 فيه تكاليف إنتاج وتخزين وشحن

🔸 لازم تتأكدي من جودة الطباعة

🔸 يحتاج تسويق قوي مثل أي نوع من انواع البزنس

🔸 أبطأ من الديجيتال من ناحية الإطلاق

 شنو أختار؟

اسألي نفسك:

1. هل تحبين التعامل مع الملفات وتنظيمها، ولا تحبين المنتج النهائي؟

2. هل عندك وقت/إمكانية للتغليف والشحن؟

3. هل عندك ميزانية لمنتجات مطبوعة؟

4. هل جمهورك يحب الأشياء الملموسة، ولا المهتمين بالتصميم الرقمي؟

ما في خيار غلط.

بعض المصممات يبدؤون بالرقمي عشان يجربون السوق، بعدين يتوسعون في المنتجات.

وبعضهم يحبّون المنتج ويبدعون في تنسيقه، فيبدؤون فيه من البداية.

 الخلاصة

  الملف الرقمي = بيع متعدد + دخل شبه سلبي

•   المنتج المطبوع = تجربة فريدة + تواصل أقرب مع العميل

•   الجمع بين الاثنين؟ ممكن، وناجح… إذا بدأتي خطوة خطوة 🌿

انا شخصيا اجمع بين الاثنين واحب الطريقتين

وإذا ودك تعرفين شلون تصممين  تصاميم قابلة للبيع بكل الطريقتين؟

عضويتنا بتفتح قريب بإذن الله

وفيها نتعلم مع بعض شلون نبيع اونلاين ،وشلون نصنع منتجاتنا  ،

سجلي بقائمة الانتظار واحصلي على ملف مجاني يساعدك تحددين خطواتك الاولى صح ، سجلي ايميلك هنا

ولو حابة تتعلمين تصميم الباترن من الصفر

،  دورة الباترن الجاية في أغسطس…وفيها نعيش التجربة كاملة: من الرسم، للتصميم، للعرض، للتسويق هي المكان الأمثل لك لو تبين تبدأين صح تقدرين تسجلين بقائمة الانتظار الخاصة بدورة الباترن هنا.

ابدئي من وين ما تحسينه أسهل لك… وخلّي الباقي يتشكل بطريقتك 💛