5 خطوات لتصميم منتجات رقمية قابلة للبيع ومرغوبة في السوق
Apr 21, 2025
أحيانًا نبدع ونصمم، ونحب شغلنا من قلب… لكن لما نعرضه للبيع، نحس إن التفاعل مو مثل ما توقعنا.
وهنا يطري علينا السؤال:
هل المشكلة في الذوق؟ ولا في اختيار الفكرة؟ ولا في طريقة العرض؟
خليني أقولك من تجربتي: مو كل تصميم نحبه راح يلقى صدى عند الناس… لكن هذا ما يعني نغيّر هويتنا.
الموضوع يحتاج توازن بسيط بين “أنا شنو أحب”، و”الناس شنو يحتاجون ويحبون يشترونه؟”
٥ خطوات تساعدك تصممين تصاميم فيها روحك، بس برؤية تسويقية ذكية:
١. افهمي السوق… بدون ما تتوهين فيه
ابدأي بملاحظة التصاميم، الانماط، والمنتجات اللي عليها طلب حاليًا:
-
هل فيه موسم (رمضان، اعياد ، مدارس، شتاء، صيف)؟
-
هل فيه ترند بالألوان أو الرسومات أو الكلمات؟
-
شنو الأشياء اللي تتكرر في المتاجر، بس تقدرين تسوينها بذوقك؟
الفكرة مو إنك تقلدين، بل تفهمين الذوق العام وتقدّمين “نسختك الخاصة” منه.
٢. اعرفي جمهورك
منو الجمهور اللي تبين تبيعين له؟
سيدة تحب ترتب بيتها؟ أم جديدة؟ صاحبة بزنس صغير؟ مصممة ديكور؟
كل ما فهمتي جمهورك أكثر، صار أسهل تختارين فكرة تصميم تخدمهم وتدخل قلوبهم.
٣. فكري في الاستخدام قبل التصميم
أي تصميم راح ينباع لازم يجاوب على سؤال:
العميل شنو بيسوي فيه؟
هل هو:
-
خلفية موبايل؟
-
مفرش؟
-
ملصق؟
-
بوكس هدية؟
- مفرش
- ورق جدران
-
طباعة على كيس قماش؟
كل ما كانت الفكرة واضحة من البداية، راح تنعكس على طريقة الرسم، الألوان، والتفاصيل.
٤. خفّفي التفاصيل… زيدي القيمة
بعض التصاميم اللي نحبها تكون “ثقيلة” بصريًا وما تنفع للاستخدام الفعلي (مثلاً للطباعة أو التكرار).
جرّبي تسوين نسخ مبسطة من شغلك.
التصميم القابل للبيع غالبًا يكون “واضح – سهل التكرار – جذّاب من أول نظرة”.
٥. لا تنسين القصة!
حتى تصميم بسيط، إذا له قصة، يتكلم عن نفسه.
قولي للناس ليش اخترتي هاللون، وشنو استلهمتي، وشنو حسيتي وإنتِ ترسمين؟
الناس تشتري التصميم… بس يشترونه أسرع لما يشوفون فيه إحساس 💛
وتذكري دايم:
مو كل تصميم يصير منتج، ومو كل فكرة تحقق مبيعات.
بس مع التجربة، التحسين، والتعلّم… راح تلقين توازنك بين الذوق والطلب،
وبتسوين تصاميم الناس تنتظرها… وتشتريها.
✨ قريب بنفتح باب العضوية الخاصة بالمصممات
وفيها بنشتغل على أفكار وتصاميم نقدر نبيعها، ونعيش منها، بدون ما نضيّع لمستنا الشخصية اذا تحبين سجلي بقائمة الانتظار واحصلي هلى هدية ، ملف يساعدك تحددين من وين تبدين وتحطين النقاط على الحروف، ولم تفتح العضوية شاركينا وتعلمي معانا
وإذا تحسين إن هذا يشبهك، جهّزي نفسك لدورة الباترن في أغسطس القادم وايضا تقدرين تنضمين لقائمة الانتظار هنا 🌿
أنت قوة ابداعية
مجتمع نسائي مبدع اونلاين
ابق على تواصل معنا
سجل بريدك الالكتروني لتصلك معلومات وفوائد عن هذا العالم الابداعي الجميل
