3 نصائح سريعة (لكن فعّالة) للمصممين المستقلين

العمل الحر في التصميم حلم كثير من المبدعين ، لأنك تشتغل من بيتك، تختار مشاريعك، وتبني أسلوبك الخاص
لكن بنفس الوقت، هو مو دايم "مثالي" مثل ما نشوف على السوشال ميديا. فيه ضغط، توتر، وأحيانًا ضياع خصوصًا في البدايات

أنا شخصيًا مريت بنفس المراحل: مرة أقبل شغل كثير وأتعب، مرة ما أنشر أعمالي لأن أحسها مو كاملة، ومرة أنسى أرتب وقتي وأتأخر على العملاء 
ومن هالتجارب طلعت بثلاث نصائح لو طبقتيها من البداية، بتوفر عليك وقت، طاقة، وحتى إحباطات ممكن تمرين فيها

النصيحة الأولى: رتبي وقتك وحطي مواعيد تسليم واضحة

الوقت هو رأس مال المصمم الحر. بدون تنظيم، بتحسين يومك كله راح وما أنجزتي شي

• جربي تقسيم يومك: مثلاً ساعات للشغل، ساعات للتعلم، وساعات للراحة
  

• مع كل عميل، اشرحي له متى بتبدئين ومتى بتسلمين العمل. هذا يخفف التوتر ويحسس العميل بالثقة
   أداة بسيطة مثل قوقل كالندر أو حتى دفتر ورقي او نوت ممكن يغيرون يومك
  
  

النصيحة الثانية: لا تخافين تعرضين شغلك حتى لو بسيط

كثير من المصممين ينتظرون "اللحظة المثالية" لنشر أعمالهم. بس الصراحة؟ هذي اللحظة ما عمرها ماراح تيي

• شاركي أي تصميم، حتى لو مو كامل. ترى التطور يبين مع الوقت
  
  

• تذكري: اللي تشوفينه "عادي"، ممكن غيرك يشوفه ملهم ✨
  
  

• كل مشاركة = فرصة توصلك، فرصة عميل يشوفك، أو حتى فرصة تتشجعين أكثر وتصممين أكث
  
  

النصيحة الثالثة: تعلّمي تقولين (لا) للطلبات اللي ما تناسبك

هذا أصعب درس في البداية، لأننا نحس أي عميل = فرصة ما تتفوت. بس الحقيقة؟ مو كل مشروع يستحق وقتك

• .بعض المشاريع تستهلك وقتك بدون مردود
  
  

• .بعض العملاء ما يحترمون وقتك أو جهدك
  
  

• .قبول كل شي يخليك تشتتين وتفقدين شغفك
  
  

.قولك "لا" مو خسارة، بالعكس هو مساحة تقولين "نعم" للمشاريع اللي تستحق

العمل الحر رحلة طويلة، واللي يخليها ممتعة إنك تبنينها على طريقتك
جربي هالأسبوع تطبقين نصيحة وحدة بس من الثلاثة… وشوفي كيف يومك بيكون مختلف

 سؤالي لك 💌
أي نصيحة حسيتها أنسب لك الآن؟ رتبي وقتك؟ تنشرين شغلك؟ ولا تقولي "لا" أكثر؟