هل الذكاء الصناعي راح ياخذ مكان المصمم؟ تجربتي الشخصية

 هالفترة قاعد أشوف كثير ناس  سواء مصممين أو حتى ناس مهتمة بالمجال  يتكلمون عن الذكاء الصناعي، وفيه تخوف واضح: "هل خلاص؟ الذكاء الصناعي راح ياخذ مكانا؟ محد بيطلب من مصمم؟ محد راح يدفع عشان يشوف شغل يدوي إذا فيه أداة تطلع له التصميم بثواني؟"

أنا بعد سمعت هالكلام كثير، وبدل ما أظل أسمع وآخذ آراء غيري، قلت لازم أجرّب بنفسي.

سويت تجربة بسيطة

فتحت كذا برنامج من برامج الذكاء الصناعي (ما راح أذكر أسماء، لأن الفكرة مو بمقارنة أدوات، بل بالتجربة نفسها)، وطلبت منه يصمم لي أكثر من تصميم، وبعضهم طلبت باترن. عطيت أوامر دقيقة، واستخدمت كلمات مفتاحية مدروسة، لأن أنا أصلاً أستخدم الذكاء الصناعي بكثرة في الأمور الإدارية لشغلي، وأعرف أتعامل معاه صح.

لكن النتيجة؟ كانت متوقعة إلى حد كبير.

كل التصاميم كانت... متشابهة. صح إنها نظيفة ومصقولة رقميًا، بس فيها شي ناقص. مافي إحساس، مافي روح. ما في "أنا" في التصميم. حتى لما طلبت منه يصمم باترن، النتيجة كانت تصاميم مو متماسكة، وبعضها فيها أخطاء غريبة، وماتصلح حتى تكون جاهزة للاستخدام.

ليش الذكاء الصناعي ما يقدر ياخذ مكان المصمم؟

الجواب بسيط جدًا: لأن التصميم أكثر من مجرد ترتيب عناصر أو ألوان على مساحة معينة. التصميم إحساس، رؤية، قرار فني مبني على تجربة ومهارة، ولمسة يد وذوق واحساس مصمم.

المصمم يبلور فكرة في عقله ويحولها لعمل فني له شخصية. فيه ضربة فرشة، فيه خط يد، فيه طاقة تنحط في كل تفصيلة. الذكاء الصناعي ما عنده "مشاعر"، ما يقدر يعيش نفس اللحظة، ما يقدر يضيف إحساسك أنت كشخص في التصميم.

هو أداة، تساعد؟ أكيد! تسهل علينا بعض الخطوات؟ نعم. بس تستبدلنا؟ مستحيل.

خلاصة كلامي

الذكاء الصناعي مو عدو لنا، هو أداة، مثل أي أداة ثانية. واللي يعرف يستخدمه بشكل ذكي، راح يطوّر شغله بدل ما يخاف عليه.

بس الفن؟ التصميم الحقيقي؟ الإبداع اللي ينبع من القلب، هذا شي ما راح تقدر تحطه في خوارزمية.

فلا تخافين، واشتغلي على مهارتك، اصقلي إحساسك، وخلّي شغلك يعكسك ذوقك وروحك ، لأنك إنتي اللي تعطيين التصميم روحه، مو أي برنامج.

اشرايكم بالموضوع؟ هل فعلا خفتي وفكرتي بهذا التفكير؟