نقشة من فنجان قهوة
Jun 24, 2025
قهوة، برتقالة، وشيء أبعد من الرسم
في صباح هادي، في الكوفي شوب اللي صارلي فترة أزوره الصبح، طلبت قهوتي وقعدت في ركني المفضل.
لكن هالمرة، وأنا أطالع كوب القهوة، شفت رسمة مختلفة متعودة اشوف وردة على ويه القهوة ، هالمرة الرسمة شدتني وخلتني افكر.
حسّيت إن فيه شي يشبه برتقالة! مادري ليش شفتها برتقالة
فكرت وايد ههه ، صورتها، ونزلتها على الإنستغرام وكتبت:
“أنا أشوف برتقالة… انتوا شنو تشوفون؟”
اللي صار بعدها خلاني أبتسم من قلبي.
الردود كانت كثيرة، وكل وحدة تشوف شي مختلف:
وهذا جانب من الردود اللي وصلتني
كل رد كان عدسة مختلفة، وكأنهم شافوا نفس الشي بس من منظور روحهم ورؤيتهم ومشاعرهم وخيالهم.
وهني تذكرت شغلة …
أنا، بكل شغلي في الرسم والنقشات، ولا مرّة رسمت برتقالة.
ما أدري ليش، بس فجأة شوقني الموضوع.
فتحت النوت اللي دايم معاي، وشخبطت برتقالة سريعة بالحبر، من الذاكرة، من المزاج، بدون تخطيط.
وحسيت بشي بدأ يتكوّن في بالي… يمكن أقدر أشتغل منها باترن ناعم، أو سكيتش أو تصميم فني مختلف شوي مادري شنو بس لازم اجرب، عاد نطروني انفذ الفكرة واوريكم هههه بس خل افضى.
كل هذا بدأ من لحظة قهوة… ومن مشاركة بسيطة مع الناس.
✨ أحيانًا نحتاج نسمح لنفسنا نلاحظ الأشياء اللي تطلع فجأه ،نتأملها ونستمتع بجمالها وتأثيرها علينا
نشاركها بدون خوف، ونسمع ردود العالم اللي حولنا… يمكن هم يشوفون فينا شي إحنا ما نشوفه.
هل في شي بسيط حولك اليوم , شكل، إحساس، فكرة ,ممكن يكون بداية لشيء اكبر؟
جربي توثقين لحظة، تشاركينها، أو حتى ترسمينها عالسريع…
يمكن تطلع منها سلسلة جديدة، مشروع، أو بس متعة حسّية تنعش يومك.
أنت قوة ابداعية
مجتمع نسائي مبدع اونلاين
ابق على تواصل معنا
سجل بريدك الالكتروني لتصلك معلومات وفوائد عن هذا العالم الابداعي الجميل
