ماذا تعلمت من تجربتي مع الرسم بصمت وهدوء؟

تجربتي مع الألوان المائية خذت منها فايدة بعيدة عن الرسم والتلوين، تعالوا أسولف لكم شنو تعلمت منها

بداية، التلوين غير ان هو مرتبط بعملي، هو أيضا علاج لي، اللي متابعيني من قبل يمكن يعرفون اني اعاني من الصداع النصفي، ولم يمسك الصداع مافي دوا يفيد، ويمكن لاني احاول ابتعد عن الأدوية قدر الامكان و مابي اتعود عليها ، احاول دايما ، الاقي طريقة ثانيه اعالج فيها نفسي، ولقيت العلاج في جلسات الرسم الصامته وكانت أول تجربة لي في هذه الجلسات في رمضان الماضي، الصداع النصفي مع الصيام متعب جدا جدا، في مرة كنت أعاني من الصداع بشكل مريب وكان قبل الفطور بساعة ومابي أفطر ، قلت لازم ألاقي لي حل، خذت ورقة وقلم ودخلت غرفتي وسكرت الباب وسكرت أي شي ممكن يصدر صوت ، وجلست بصمت ارسم واركز بالرسم والنقوش اللي اصنعها، سبحان الله ارتحت جدا وخف الصداع حيل، ومن يومها صرت اعتمد هذه الطريقة لم اعاني من صداع شديد  

تجربتي بالرسم بصمت الأخيرة كانت الاسبوع الماضي، بعد ما فتحت علبة ألوان جديدة طالبتها من زمان وحبيت استخدمها، استمتعت فيها، يمكن لأني بديت بترتيب وبديت صح، فكان سهل على استخدامها، بسولف لكم اليوم عن الرسم بالألوان المائية واللي أساسا ما استخدمه كثير في تصاميمي ، لكن أحب استخدمه بين فترة والثانية، لأن الرسم بالألوان المائية بحد ذاته متعة وعلاج

من بديت اشتريت ألوان حلوة من Wisor&nuten من ٢٠٢٠، استخدمتهم وكانو وايد حلوين ولي اليوم استخدمهم وحلوين وخلصت الألوان اللي تعجبني منها درجة الأخضر والأزرق، أحب هالألوان واستخدمهم دايم

 قبل فترة  اشتريت ألوان جديدة بصراحة طلبتها لأن شكلها عجبني، بس لم استخدمتها وايد حبيتها وحبيت درجاتها، واستخدمتها بالرسم بدون ما أغير أو أخلط ألوان لأني حبيت أستخدم نفس الدرجات الموجودة لأنها عاجبتني 

اللي عجبني ان الألوان معاها ورقة فيها اسم كل لون ورقمه حتى أعبيه ويكون لي مرجع، قلت خل أجرب وفعلا عبيته كل الألوان وحبيت درجاتهم جدا، ولاحظت اني لم بديت استخدم الألوان خلال اسبوع كامل كل يوم أرجع لهذه الورقة لأن الألوان وهي بالباليت ماتبين شنو لونها فهالطريقة وايد ساعدتني خصوصا اني مو رسامة ، ارسم على قدي فحسيت انها كانت مرجع لي ساعدتني بالرسم بشكل أسرع

مر اسبوع و أنا كل يوم ارسم فيهم، التزمت بـ ٣٠ دقيقة يوميا ارسم فيها بهدوء، بدون مشتتات، بدون أصوات، بدون موسيقى، بدون بودكاست، بدون أي شي، صمت شديد، وهذي طريقتي في علاج الصداع اللي يصيبني ( أنا اساسا أعاني من الصداع النصفي) 

لم جربت أول يوم الرسم بصمت، ارتحت جدا وحسيت اني مركزة ومستمعة بكل تفصيله خلال هذه النص ساعة، كررت الموضوع لمدة اسبوع كامل ، وفعلا ارتحت واستمتعت وحمدت ربي على نعمة الصمت اللي قدرت اعيشها، و أفكر اني أخليها عادة يومية من ١٥-٣٠ دقيقة رسم بصمت 

العمل بصمت وسيلة رائعة للحصول على الاسترخاء، الهدوء ، السكينة، والتفكير الابداعي

خلال هذا الاسبوع طلعت بـ ٧ وردات، رسمتها من صور التقتطها من زمان وحبيت اني اشوفها عالورق، بشنو بستخدم هذه الوردات؟ لحد الحين مافي فكرة في بالي لكن أكيد بيصير لهم وقت واستخدمهم

شنو اللي تعلمته من تجربة هذه الألوان، غير انها حلوة بالرسم، فكرة تنظيم الألوان في الورقة أكدت لي ان تنظيم العمل له فوائد كثيرة منها

 يزيد التركيز -

يوفر الوقت -

يزيد الابداع -

و لأني بعيدة عن التنظيم واعتبر نفسي اعمل بفوضوية ، وبصراحة احيانا احب الفوضى بس بعد أحيانا آتمنى اكون منظمة، قررت اني أحاول أنظم عملي أكثر

الفايدة من جلسة الرسم اليومية خلال الاسبوع كانت

أولا علاج بدوء دواء

ثانيا التنظيم يزيد يوفر الوقت ويزيد التركيز

شنو فكرتكم عن تنظيم العمل؟ سواء عمل، رسم، حياة، مهام منزلية أو دراسة؟