من رسمة في دفترج… إلى باترن احترافي تعرفين شلون تعرضينه وتبيعينه
دورة فن تصميم الباترن، النسخة الذاتية. ٨ فصول مسجلة تمشين فيها بوقتج: من أول مرة تفتحين فيها برنامج الإليستريتور (Adobe Illustrator)، لين ملف باترن جاهز للطباعة، وكوليكشن، وبورتفوليو، وفهم واضح لطرق البيع والترخيص.
للمبتدئة اللي تحب الرسم وتبي تبدأ صح، وللمصممة اللي عندها مهارة وتبي تفهم البزنس.
التسجيل من ١ إلى ١٤ نوفمبر ٢٠٢٦ بس.
🎁 هدية التسجيل المبكر: سجلي قبل الأربعاء ٤ نوفمبر الساعة ١١:٥٩ بالليل (بتوقيت الكويت)، ولج شهر مجاني في عضوية «القوة الإبداعية» مع الدورة.
إذا هذا إنتي… فإنتي في المكان الصح
عندج رسمات في دفتر أو على الآيباد، وكل ما شفتي ورق جدران أو قماش حلو قلتي في نفسج: ليش ما يكون هذا تصميمي؟ بس بعدها يجي السؤال اللي يوقفج كل مرة: من وين أبدأ؟
يمكن جربتي يوتيوب، ولقيتي معلومة هني ومعلومة هناك، وكل وحدة ناقصة. ويمكن الخوف أكبر من الحماس: أخاف أتعب وأطلع بشي ما يعجب أحد غيري. أخاف شغلي ما يسوى. وأخاف ما ألقى وقت بين الدوام والبيت والعيال.
أعرف هالشعور، مريت فيه قبل. والمشكلة غالباً مو في موهبتج. المشكلة إنه ما في طريق واضح تمشين عليه خطوة بعد خطوة.
أنا ما بديت فنانة… بديت ابلة كهربا
أنا فاطمة. درست تربية تخصص كهرباء غصب عني، واشتغلت ابلة كهربا وأنا أكره المادة، لين تحولت سنة ٢٠٠٧ لمعلمة حاسوب وعشت أحلى سنين حياتي الوظيفية. بعد ١٩ سنة تقاعدت مبكر، وكان شرطي بزنس أونلاين من البيت.
جربت مشاريع تعليمية: دورة تصميم ألعاب تعليمية، وبطاقات وقصص. كنت مبدعة فيها، بس ما مشت. ليش؟ لأني بديت غلط: بدون جمهور، بدون أساس بزنس، بدون خطة واضحة.
بعدها تعرفت على تصميم الباترن، وكان حب من أول نظرة. تعلمت من مصممات في أمريكا وبريطانيا وأستراليا، مو بس شلون أرسم، بس شلون أبيع رسمي وأرخصه. وأول فلوس من تصميمي؟ وصلني مسج من عميلة لقتني بالصدفة، تبي تصميم بلانكيت وتضيف عليه اسم ولدها (محمد). غورقت عيوني، وحسيت إن شغفي له قيمة.
بعد سنة ونص تقريباً قلت: ليش ما أعلم غيري الطريق اللي مشيته؟ ومن هني ولدت هالدورة. مو من نظريات، من تجربة حقيقية جربتها بنفسي.
الطريق بثلاث محطات
١. تتعلمين الأداة. تبدين برنامج الإليستريتور (Adobe Illustrator) من الصفر، وتحولين رسمتج (باليد، بالآيباد، أو بالتصوير) لفيكتور نظيف وملون.
٢. تبنين الباترن والكوليكشن. تكرار صحيح، ملف جاهز للطباعة، مجموعة متناسقة، وبورتفوليو يعرض شغلج.
٣. تفهمين البزنس. العلامة التجارية، والترخيص والبيع للشركات، والبيع أونلاين، وخطة تسويق تبدين فيها.
ليش الإليستريتور؟ لأن الشركات والمصانع وشركات الترخيص تتوقع ملف فيكتور منه. تصميمج يكبر ويصغر بدون ما يخرب، وألوانه تتغير بكبسة، ويكون جاهز للإنتاج. واللابتوب هو الأساس، والآيباد اختياري.
«أنا ما أعرف أرسم»… ينفع؟ إي ينفع. تصميم الباترن مو امتحان رسم. بتتعلمين طرق مختلفة: من الخربشة، ومن الصور، ومن عناصر بسيطة تتحول لباترن.
شنو داخل الدورة؟
الفصل ١: استوديو الإلهام ، من خلاله بتتعلمين تصنعين ستوديو إلهامك الخاص، اسبوع من المتعه والإبداع.
الفصل ٢: رسم وتجهيز الزخارف، بتجهزينها بطرق مختلفة سواء كنت تعرفين ترسمين أو لا وبتختارين الطريقة المناسبة لك.
الفصل ٣: أساسيات برنامج الإليستريتور (Adobe Illustrator). عشان تفتحين البرنامج وإنتي عارفة شنو تسوين، من الصفر.
الفصل ٤: احتراف الإليستريتور. عشان تحولين رسمتج لفيكتور وتلونينها بثقة.
الفصل ٥: بناء الباترن. عشان تسوين تكرار صحيح وتطلعين ملف جاهز للطباعة.
الفصل ٦: الكوليكشن والبورتفوليو. عشان تجمعين تصاميمج في مجموعة متناسقة وبورتفوليو تعرضينه.
الفصل ٧: العلامة التجارية. عشان تختارين اسم وهوية وقصة لشغلج.
الفصل ٨: الترخيص والبيع للشركات. عشان تعرفين شلون تعرضين تصاميمج على شركة، وتفهمين العقود.بيع تصاميمج ومنتجاتج أونلاين. عشان تعرفين الطرق المختلفة للبيع: مباشر، متجر، منتجات.
ومعاها
← الفصول الثمانية مسجلة، ومفتوحة لج من أول يوم، عشان تمشين بسرعتج.
← أوراق عمل وملفات للتحميل وكتاب إلكتروني لكل فصل، عشان تطبقين مو بس تتفرجين.
← مقابلات مع مصممات وشركات، عشان تسمعين من داخل السوق.
← مكان لأسئلتج تحت كل درس، وأرد عليها يوم محدد كل أسبوع.
← شهادة حضور.
اللي مو داخل هالنسخة
لايفات، ومتابعة مباشرة، وتصحيح لشغلج. هذي نسخة ذاتية. والنسخة اللايف احتمال ترجع صيف ٢٠٢٧.
لمن هذي الدورة؟ ولمن مو؟
تناسبج إذا
← تحبين الرسم أو التصميم، وتبين تحولين هوايتج لشغل حقيقي.
← إنتي مبتدئة ومستعدة تتعبين شوي. الدورة من الصفر، بس بصراحة الفصول الأولى كثيفة وتحتاج صبر ووقت، خصوصاً إذا أول مرة تفتحين البرنامج.
← إنتي مصممة عندج مهارة، بس تبين تفهمين الترخيص والبيع والبزنس.
← تفضلين تتعلمين بوقتج، بدون جدول لايفات، وعندج لابتوب.
ما تناسبج إذا
← تبين متابعة مباشرة وتصحيح لشغلج أول بأول.
← تدورين ربح سريع بدون تطبيق. الدورة تعلمج الطريق، والشغل والاستمرار عليج.
إذا قريتي الأولى وحسيتي إنها تكلمج، لا تخلين الخوف يقرر عنج. أغلب اللي بدوا معاي كانوا خايفين مثلج.
شنو قالت متدربات الدفعات السابقة؟
«كنت أدور في يوتيوب عن كيف أصنع باترن، بس دايماً المعلومات ناقصة ومبعثرة. في هذي الدورة كل المعلومات اللي كنت أبحث عنها موجودة. قبل الدورة أعطي نفسي ٢ من ١٠، وبعدها ٨ من ١٠.»
متدربة من دفعة ٢٠٢٥
«قبل الدورة ما كان عندي هاجس البزنس، وبعدها اشتغل الهاجس وما طفى لين الحين. تقييمي لها ١٠ من ١٠.»
متدربة من دفعة ٢٠٢٥
«شرحت لنا كل الطرق بالتفصيل للدخول لعالم الباترن حتى لو ما كنتي رسامة.»
متدربة من دفعة ٢٠٢٤
«أنا بصراحة كنت مترددة لما سجلت، بس بعد ما بدينا ما ندمت إني سجلت.»
متدربة من دفعة ٢٠٢٣
«تسلسل الدروس فيها مدروس وينفهم بسهولة، والأهم إنها تظل معاي مرجع أرجع أفتحها وقت ما احتجتها.»
متدربة من دفعة ٢٠٢٥
«حبيت إنها علمتنا حتى عالبزنس، مو بس كيفية التصميم في البرنامج.»
متدربة من دفعة ٢٠٢٤
قصص نجاح من طالبات الدورة
ثلاث طالبات بدأوا بخطوة، وصار لكل وحدة منهن مشروع باسمها.
شهلا | كرزة للتصميم
كان عندها مشروع بخور وعطور تراجعت مبيعاته، وكانت تشتاق لهواية الرسم. بعد الدورة صارت تصمم أقمشة للجلابيات والمخورات، وترفع تصاميمها على سبون فلاور (Spoonflower). وأكثر شي تغير عندها، بكلامها، إنها التزمت بساعات عمل محددة بدون تشتيت.
«الخطوة الأولى هي الأصعب لكنها هي الأهم — بعدها يجي الاستمرارية والسعي للنجاح.»
فاطمة | FIM HOME
كانت تلوّن بالألوان المائية وتقدم ورش تلوين. بعد الدورة أسست متجر هوم ديكور باسم إف آي إم هوم (FIM HOME) بتصاميمها الحصرية. قالت إن الدورة عطتها نظرة شاملة لزوايا العمل الحر، ووضحت لها الأمور اللي لازم تتعلمها وتبحث فيها قبل ما تبدأ مشروعها.
حنان | تَحنان
مصممة جرافيك حوّلت حبها للترتيب والتفاصيل الهادئة إلى مشروع تَحنان: منظمات وتقويمات ومنتجات ورقية. أكثر شي تغير عندها، بكلامها، الثقة بنفسها وبمشروعها، وعرفت كيف تبدأ بدل التردد والتأجيل.
«لا تنتظرين الكمال، ابدئي باللي عندك حتى لو بخطوة صغيرة، لأن البداية البسيطة أفضل من فكرة جميلة ما طلعت للنور.»
سجلي في الدورة
دفعة وحدة. اختاري العملة اللي تناسبج، والدورة نفسها بالضبط.
🎁 هدية لأول ٣ أيام: أي وحدة تسجل قبل الأربعاء ٤ نوفمبر الساعة ١١:٥٩ بالليل، لها شهر مجاني في عضوية «القوة الإبداعية». نفتحه لج بعد ما تسكر الهدية، بدون ما تدخلين بطاقة.
بعد الدفع يوصلج إيميل من منصة تعلّمي مع مونور (learn.monordesign.com) فيه رابط الدخول. اكتبي إيميلج صح وقت الدفع.
ليش تتعلمين مني؟
لأني أعلمج اللي أسويه فعلاً. عندي براند منتجات من تصاميمي، وشراكات ترخيص نشطة في أمريكا وبريطانيا وألمانيا والكويت.
وفي سبتمبر ٢٠٢٦ شاركت لأول مرة في معرض ميزون إي أوبجيه باريس (Maison & Objet)، وظهرت في مجلة الديكور الإيطالية (G&G) كمصممة كويتية.
Monor Home
براندي الخاص: منتجات من تصاميمي أبيعها على موقعي.
Textilwerk
ترخيص مع شركة هوم ديكور ألمانية، ومنتجاتها تنباع في أوروبا.
Limitless walls
ترخيص مع شركة ورق جدران أمريكية.
جزء من أعمال المتدربات في الدورة
كلمة صريحة قبل ما تسجلين
هالدورة تعطيج الأساس كامل: الأداة، والباترن، والكوليكشن، وفهم البزنس. بس هي بداية الطريق، مو نهايته.
اللي بيفرق بعدها هو شغلج واستمرارج: إنج تصممين، وتعرضين، وتجربين، وتغلطين وتتعلمين.
ما أقدر أوعدج بأرباح. اللي أقدر أوعدج فيه إني بعلمج الطريق اللي مشيته بنفسي، بكل تفاصيله.
أسئلة توصلني كثير
متى يفتح التسجيل ومتى يقفل؟
تناسبني إذا أنا مو مصممة وما أعرف البرنامج؟
لازم أعرف أرسم؟
شنو البرامج والأدوات اللي أحتاجها؟ وكم تكلف؟
كم ساعة أحتاج بالأسبوع؟
كم مدة الوصول للدورة؟
فيه تقسيط؟ وشنو يصير إذا وقفت الدفع؟
في لايفات أو متابعة مباشرة؟
هل أضمن إني بربح بعد الدورة؟
أقدر أصمم دفاتر وأوراق تغليف وأقمشة؟
حقوق التصاميم اللي أسويها لمن؟
سياسة الاسترجاع
آخر كلمة مني
سويت هالدورة لأني أعرف شعور إنج تحبين شي ومو عارفة شلون تبدين فيه. أنا بديت متأخرة، وبديت من تخصص ما له أي علاقة بالفن. صدقيني إذا أنا قدرت، إنتي بتقدرين.
العالم يحتاج فنج. والتسجيل يقفل ١٤ نوفمبر.